काठमाण्डौ – हिमाल एफ.एम.को सञ्चालक समितिको अध्यक्षमा निमा शेर्पा सर्वसम्मत चयन भएका छन् । एफ.एम.संचालक संस्था हिमाली सञ्चार लिमिटेडको काठमाण्डौ स्थित होटल तिब्बतमा आईतबार सम्पन्न ९ औँ साधारण सभाले शेर्पाको नेतृत्वमा सर्वसम्मत सञ्चालक समिति चयन गरेको हो ।
हिमाल एफ.एम.का संस्थाक शेर्पा तेश्रो पटक सञ्चालक समितिको अध्यक्ष बनेका हुन् । कम्पनीका शेयर धनीहरु उपस्थित साधारण सभाको बन्द सत्रबाट कम्पनीको उपाध्यक्षद्वयमा आङ फिन्जो शेर्पा र महेश किराँती चयन भए । शेर्पा यस अघिको समितिमा पनि उपाध्यक्षकै जिम्मेवारीमा रहेका थिए भने किराँती कम्पनीको संस्थापक कोषाध्यक्ष थिए ।
कम्पनीका संस्थापक भानुभक्त निरौला प्रबन्ध संचालकमा चयन भएका छन् । आमसञ्चार तथा पत्रकारितामा स्नातकोत्तर गरेका निरौला विगत डेढ दशकदेखी हिमाली जिल्ला सोलुखुम्बुलाई केन्द्र बनाएर पत्रकारितामा क्रियाशिल छन्। कम्पनीको सचिवमा यस अघिका संचालक समिति सदस्य कान्छा शेर्पा चयन भए ।
त्यस्तै कम्पनीका संस्थापक कर्मा शेर्पा र दावागेलु पाख्रिन कम्पनीको संचालकमा चयन भएका छन् । शेर्पा र पाख्रिन यस अघिका समितिहरुमा महत्वपूर्ण जिम्मेवारीहरु निर्वाह गरिसकेका व्यक्ति हुन् । कम्पनीको बन्दसत्रले अध्यक्षले पेश गरेको बार्षिक प्रतिवेदन र संचालक कान्छा शेर्पाले प्रस्तुत गरेको आर्थिक प्रतिवेदन पनि पारित गरेको छ ।
उक्त कम्पनीले वि.सं.२०६८ सालदेखि हिमाली जिल्ला सोलुखुम्बुमा १ हजार वाट क्षमताको हिमाल एफ.एम. ९०.२ मेगाहर्ज संचालन गरिरहेको छ । उक्त एफ.एम.को सदरमुकाममा आफ्नै सुविधासम्पन्न भवन छ भने ३२ सय मिटरको उचाईमा रहेको पत्तालेडाँडामा प्रसारण प्रणाली राखि कोशी, मधेस र बागमती प्रदेशका गरि ४० भन्दा बढी जिल्लामा प्रशारण पहुँच रहेको छ ।
हिमाल समाचार डट कम नामको आफ्नै अनलाईन समाचार पोर्टल, लाखौँ फलोवर भएको फेसबुक पेज र युटुव च्यानल समेत संचालनमा रहेको छ ।
