जेठ १, सोलुखुम्बु । सोलुखुम्बुको महाकुलुङ गाउँपालिका ३ मा अवस्थित बरुन्त्से हिमालबाट १८ टन (१८ हजार किलो) बढी फोहोर संकलन गरिएको छ । ‘सफा हिमाल २०२३’ अभियान अन्र्तगत नेपाली सेनाको नेतृत्वमा गएको हिमाल सफाई टोलीले १८ हजार ५६० किलो फोहोर संकलन गरेको हो ।
बरुन्त्से हिमालको दोश्रो क्याम्पसम्म पुगेर संकलन गरिएको फोहोरमा डोरी, टिनको क्यान, पाल, फलामका टुक्रा, इपिग्यासका खोल, प्लाष्टिक, टेन्ट, कपडा, रबर, कागज, बोतल लगायतका रहेका छन् ।
![बरुन्त्से हिमालबाट १८ हजार किलो बढी फोहोर महाकुलुङ झारियो 1 1 4](https://www.satyapress.com/wp-content/uploads/2023/05/1-4-1024x768.jpg)
१५ हजार ५१० किलो नकुहिने र ३ हजार ५० किलो कुहिने उक्त फोहोर हेलिकप्टर मार्फत महाकुलुङको पेल्माई ल्याएको नेपाली सेनाका मेजर समिर बहादुर बस्नेतले जानकारी दिए ।
उनका अनुसार कुहिने फोहोर महाकुलुङ गाउँपालिका २ पेल्माङमा नष्ट गरिएको छ भने नकुहिने फोहोर गाडी मार्फत काठमाण्डौँ लगिने छ । नकुहिने फोहोरहरुलाई काठमाण्डौँ स्थित रिसाईकलन कम्पनीमा जिम्मा लगाइने उनले बताए ।
![बरुन्त्से हिमालबाट १८ हजार किलो बढी फोहोर महाकुलुङ झारियो 2 4](https://www.satyapress.com/wp-content/uploads/2023/05/4-1024x576.jpg)
१० हजार किलो फोहोर संकलन गर्ने लक्ष्यका साथ गत चैत्र २३ गते निस्किएका नेपाली सेनाको टोलीले लक्ष्य भन्दा बढी फोहोर संकलन गरेको छ । यद्यपी निरन्तरको हिमपात र हावाका कारण क्याम्प २ भन्दा माथी जान नसकिएको मेजर बस्नेतले बताए ।
![बरुन्त्से हिमालबाट १८ हजार किलो बढी फोहोर महाकुलुङ झारियो 3 3 2](https://www.satyapress.com/wp-content/uploads/2023/05/3-2-1024x768.jpg)
७ हजार १६२ मिटर उचाई भएको बरुन्त्से हिमाल सफाईका लागि ९ जना सेना र २३ जना शेर्पाको टोली खटिएका थिए । वातावरण मन्त्रालय अन्र्तगत ‘सफा हिमाल अभियान २०२३’ मार्फत नेपाली सेनाको अगुवाईमा भएको जनाइएको छ ।