सोलुखुम्बु । औषधी व्यवस्था विभाग विराटनगरले ताला लगाएको सोलुखुम्बुको सदरमुकाम सल्लेरीमा सञ्चालित एक औषधी पसलले खुलमखुला औषधी बिक्री गरिरहेको पाइएको छ ।
विभागले गत चैत्र २३ गते गरेको अनुगमनको क्रममा विभिन्न कम्जोरी औल्याई तत्काललाई औषधी बिक्री गर्न रोक लगाउँदै ताला लगाएको सल्लेरी मेडिकल हलले अहिले निर्वाद रुपमा औषधी बिक्री गरिरहेको पाइएको हो ।
अनुगमनको क्रममा करिब ४ वर्षदेखि फार्मेसी नविकरण नगरेको तथा औषधी पसलबाटै निर्माण सामाग्री देखि किराना सामान समेत राखेर बिक्री गरेको पाइएकाले औषधी पसलमा विभागले ताला लगाएको थियो ।
सबै सामाग्रीहरु एकै ठाउँ राखेर बिक्री गर्न नपाउने प्रावधान भएपनि सल्लेरी मेडिकल हलले त्यसको पटक पटक अवज्ञा गर्दै एकै स्थानबाट सबै सामाग्री बिक्री गरिरहेको पाइएको विभागले जनाएको छ । उक्त कम्जोरी सुधार गर्न पटक पटक समय दिदा समेत अटेर गरेकाले विभागमा नै उपस्थित हुन ७ दिने अल्टिमेटमसहित चैत्र २६ गते औषधी पसल तर्फको द्वारमा ताला लगाइएको फार्मेसी निरीक्षक दिपेन्द्र खड्काले बताए ।
सल्लेरी मेडिकल हलले चैत्र ३० गते औषधी बिक्री गर्दा काटेको विल
साथै उक्त फार्मेसीले २०७५ सालपछि दर्ता समेत नविकरण नगरेको पाईएको विभागले जनाएको छ । तर औषधी पसल तर्फको ढोकामा ताला लगाएपनि अर्को तर्फको ढोका प्रयोग गरी उक्त फार्मेसीले औषधी बिक्री गरिरहेको तथ्य सत्य प्रेसले फेला परेको हो ।
यता विभागले भने उक्त फार्मेसी सम्पर्कमा समेत नआएको बताएको छ । फार्मेसीको नविरकण समेत फेल भईसकेको र आफुहरुले पसल सञ्चालक भगवती गुरुङ (बज्राचार्य) लाई पटक पटक ताकेता गर्दा समेत सम्पर्कमा नआएको औषधी व्यवस्था विभागका प्रमुख टेकेन्द्र मिश्रले सत्य प्रेससँग बताए ।
उनले भने, ‘अब हामीले पटक पटक सचेत गराउँदा समेत सल्लेरी मेडिकल हलले हटेर गरेको छ, नागरिकको स्वास्थ्य माथी खेलवाड गर्ने छुट कसैलाई छैन यो गर्न पाइदैन् । औषधी पसलको लाईसेन्स चुस्तदुरुस्त भएको खण्डमा त्यहि अनुसार कारबाही प्रकया अघि बढ्थ्यो अब त्यो अवस्था पनि भएन, यस्तो अवस्थामा अब प्रहरीको सहायता लिएर सञ्चालकलाई नै पक्राउ गर्न लगाउनुको विकल्प छैन् । हामी त्यहि अनुसार अघि बढ्छौ ।’
