सोलुखुम्बु । सोलुखुम्बुको खुम्बु क्षेत्र हिउँले ढपक्कै ढाकेको छ । गत शुक्रबारदेखि निरन्तर भइरहेको हिमपातले खुम्बु क्षेत्र पुरै हिउँले ढाकेको स्थानीयले बताएका छन् ।
नाम्चेमा मात्रै करिब ४ इन्च भन्दा बढी हिउँ जमेको छ भने त्यस भन्दा माथिल्लो क्षेत्रमा बाक्लो हिउँ जमेको नाम्चेका पर्यटन व्यवसायी लामाजी शेर्पाले जानकारी दिए ।
हिमपातसँगै पर्यटकहरु हिउँमा रम्न थालेको सगरमाथा राष्ट्रिय निकुञ्जका प्रमुख संरक्षण अधिकृत भुमिराज उपाध्यायले बताए ।
शनिबार दिनभर हिउँ परेर आज आईतबार विहानदेखि घाम लागेसँगै खुम्बु क्षेत्र टलक्कै हिउँले टल्किएको छ ।
जसका कारण हिउँमा रमाउने पर्यटकहरु विहानैदेखि हिउँ खेल्न निस्किएको पर्यटन व्यवसायी नरेन्द्र राईले बताए ।
लामो समयको प्रतिक्षापछि भारी मात्रामा हिमपात भएका कारण खुम्बुका होटल, व्यवसायी, पर्यटन व्यवसायीदेखि स्थानीय समेत उत्साहित बनेका छन् ।
तस्विर सौजन्य- लामाकाजी शेर्पा र भुमिराज उपाध्याय
