सोलुखुम्बु । केरामा देखिएको प्रकोपका कारण सोलुखुम्बु देउसाका किसान चिन्तित बनेका छन् । व्यावसायिक रूपमा गरिएको केरा खेती पछिल्लो समय अज्ञात रोगका कारण मासिदै जान थालेपछि किसानमा चिन्ता थपिएको हो । थुलुङ दुधकोशी गाउँपालिका ७ देउसाका अग्नी राईले करिब १५ रोपनी क्षेत्रफलमा केरा खेती गरेका छन् ।
विगत लामो समयदेखि केराखेती गर्दै आएका राई पछिल्लो समय केरामा देखिएको बोट पहेलो हुने प्रकोपका कारण चिन्तित छन् । किसानले अहिले केराको बोट पहेलो हुने र विस्तारै विरुवा नै मासिदै जाने प्रकोपको सामना गरिरहेका छन् । उपचार गर्दा समेत नियन्त्रण हुन नसक्दा केरा खेतीबाट नै पलायन हुने अवस्थामा पुगेको किसान बताउँछन् ।
जिल्लामा हाल करिब ४ हेक्टर क्षेत्रफलमा लगाईरहेको केराले उत्पादन दिइरहेको कृषि ज्ञान केन्द्रको तथ्यांक छ । थुलुङदुधकोशीको देउसालाई केरा उत्पादन हिसाबले जिल्ला राम्रो क्षेत्र मानिन्छ । तर अहिले बोट पहेलो हुने प्रकोपले केराको विरुवा नै मासिदै गएपछि अन्यौलमा परेको थुलुङ दुधकोशी गाउँपालिका ८ देउसाकी सुकुमाया राईको भनाई छ ।
व्यावसायिक केरा खेतीमा लागेका किसानलाई अप्रत्यासित रूपमा केरामा देखिएको रोगले चिन्तित बनाएको छ । यसको नियन्त्रणका लागि स्थानीय तह लागि परेको गाउँपालिकाका बाली विकास अधिकृत डिल्लुनाथ योगी बताउँछन् ।
तर थुलुङ दुधकोशीमा रसायनिक विषादी प्रयोग गर्न प्रतिबन्ध लगाइएकाले जैविक विषादी तयार गर्ने योजनामा रहेको उनको भनाई छ । व्यावसायिक केरा खेतीमा त्यो पनि उत्पादन लिने बेला देखिएको रोगले किसान मर्कामा परेका छन् ।
