काठमाडौँ, पुस १५ । आगामी मे २९ मा एभरेष्ट टुरिज्म अवार्ड २०२६ आयोजना हुने भएको छ । नेपालको पर्यटन, संस्कृति, शान्ति र सामाजिक पहिचानलाई अन्तर्राष्ट्रिय स्तरमा प्रवद्र्धन गर्ने उद्देश्यसहित एएमएस म्यूजिक एण्ड इन्टरटेनमेण्ट प्रा.लि.को आयोजनामा उक्त अवार्डं आयोजना हुने भएको हो । उक्त कार्यक्रमबारे जानकारी दिन आज मंगलबार राजधानी काठमाडौँमा प्रेस मिट सम्पन्न भएको छ ।
यस अवार्ड केवल सम्मान कार्यक्रम मात्र नभई नेपाललाई विश्व पर्यटनको महत्वपूर्ण गन्तव्यका रूपमा पुनःस्थापित गर्ने दीर्घकालीन अभियानको एक अङ्ग भएको संस्थाका अध्यक्ष सत्यकला तामाङ लामाले बताइन् । आयोजकले सगरमाथा क्षेत्रलाई केन्द्रमा राख्दै समग्र नेपाली पर्यटन, सांस्कृतिक विविधता र शान्तिको सन्देश विश्व समुदायसमक्ष पु¥याउने लक्ष्य लिएको बताएका छन् ।
नेपाल विश्व शान्तिको भूमि भएको उल्लेख गर्दै बुद्ध जन्मभूमि लुम्बिनीदेखि सगरमाथासम्म फैलिएको पहिचानलाई पर्यटनसँग जोडेर अन्तर्राष्ट्रिय मञ्चमा प्रस्तुत गर्ने उद्देश्य रहेको संस्थाका प्रबन्ध निर्देशक फुर्बा ग्याल्बो मोक्तानले बताए । यही भावनालाई आत्मसात् गर्दै ‘एभरेष्ट टुरिज्म अवार्ड २०२६’ लाई ‘विश्व शान्ति सम्मेलन २०२६’ सँगै आयोजना गरिने जानकारी गराइएको छ ।
विश्व शान्ति सम्मेलन २०२६ मा विभिन्न देशका शान्ति अभियन्ता, पर्यटन विज्ञ, कूटनीतिज्ञ, कलाकार, मिडिया व्यक्तित्व तथा विश्वभरका करिब ६५ देशका सामाजिक अभियन्ताहरूको सहभागिता रहने संस्थाका प्रमुख सल्हाकार नाम्गेल शेर्पाले बताए । सम्मेलनमार्फत विश्व शान्ति, दिगो पर्यटन, सांस्कृतिक सहअस्तित्व, वातावरण संरक्षण र मानवताको साझा मूल्यबारे बहस तथा विचार आदान–प्रदान गरिने उनको भनाइ छ ।
अर्का सल्हाकार महेश किराँतीले सगरमाथा केवल नेपालको गौरव मात्र नभई सम्पूर्ण मानव सभ्यताको साझा सम्पदा भएको उल्लेख गरे । सगरमाथा क्षेत्रको संरक्षण, दिगो पर्यटन विकास र स्थानीय समुदायको जीवनस्तर उकास्न यस्ता अन्तर्राष्ट्रिय कार्यक्रमहरूले महत्वपूर्ण भूमिका खेल्ने उनले विश्वास व्यक्त गरे । आयोजकका अनुसार एभरेष्ट टुरिज्म अवार्ड २०२६ अन्तर्गत पर्यटन, संस्कृति, संगीत, चलचित्र, मिडिया, समाजसेवा, वातावरण संरक्षण तथा अन्तर्राष्ट्रिय सम्बन्धका क्षेत्रमा उल्लेखनीय योगदान पु¥याएका राष्ट्रिय तथा अन्तर्राष्ट्रिय व्यक्तित्व र संस्थाहरूलाई सम्मान गरिनेछ ।
अवार्ड छनोट प्रक्रिया निष्पक्ष, पारदर्शी र अन्तर्राष्ट्रिय मापदण्डअनुसार हुने आयोजकको दाबी छ । नेपालभित्र मात्र नभई नेपाल र विश्व शान्तिका लागि योगदान पु¥याएका विदेशी व्यक्तित्वहरूलाई समेत सम्मान गरिनेछ । विशेषगरी सगरमाथा क्षेत्रको पर्यटन प्रवद्र्धन, हिमाली जीवनशैली, शेर्पा समुदायको योगदान, हिमाली संस्कृति र वातावरण संरक्षणका विषयलाई प्राथमिकतामा राखिने जनाइएको छ । टुरिज्म अवार्ड तथा विश्व शान्ति सम्मेलन २०२६ को मिति, स्थान र विस्तृत कार्यतालिका छिट्टै सार्वजनिक गरिने आयोजकले जनाएको छ ।
