सोलुखुम्बु । सगरमाथा क्षेत्रमा पदयात्रा निर्माणका अभियान्ता पासाङ शेर्पाको ८१ वर्षको उमेरमा निधन भएको छ । माप्यदुधकोशी गाउँपालिका ४ काँकुमा वि.स.१९९९ मा जन्मिएका शेर्पाको आईतबार खुम्बु पासाङ ल्हामु गाउँपालिका ५ नाम्चेमा निधन भएको पारिवारिक श्रोतले जनाएको छ ।
उनले २०४१ साल देखि आफ्नो जीवननै खुम्बु क्षेत्रको पर्यटन मार्ग निर्माणमा समर्पण गरेका थिए । सगरमाथा क्षेत्रको जिर्ण पदमार्ग निर्माणका लागि विदेशी पर्यटकहरुबाट चन्दा संकलन गरी बाटो मर्मत गर्दै आएका थिए ।
उनले ठाउँ ठाउँमा गरी १० किलो मिटर भन्दा बढी पदमार्ग चन्दा संकलनकै माध्यमबाट निर्माण गरेको खुम्बु पासाङ ल्हामु गाउँपालिका ४ का वडाध्यक्ष लक्ष्मण अधिकारीले बताए ।
जसका कारण हजारौँ पर्यटकहरुलाई सहजता भएको जानकारहरु बताउँछन् । उनको आज खुम्बुका जनप्रतिनिधि, नाम्चे गुम्बा, नाम्चे युवा समुह, नेपाल प्रहरीसहितको सहभागितामा नाम्चे नजिकै बौद्ध परम्परा अनुसार अन्त्येष्टि गरिएको छ ।
