सोलुखुम्बु । ‘लागु पदार्थ दुव्र्यसन तथा विपद् व्यवस्थापन’ विषय सचेतनामुलक कविता प्रतियोगितामा निकिता कार्की प्रथम भएकी छन् । ‘हामी स्वयमसेवी अभियान’ कोशी प्रदेशको आयोजनामा आज सोमबार सल्लेरीमा सम्पन्न कविता प्रतियोगितामा हिमगंगा मावि लिखुपिकेकी कार्की प्रथम भएकी हुन् ।
प्रतियोगितामा हिमाल दर्शन मावि नेचाका सञ्जिव भण्डारी द्वितिय, गार्मा मावि गार्माका निर्मल कोईराला तृतिय र जिवन ज्योति मावि काँगेलकी सदिना बस्नेत सान्तवना भएका छन् । प्रथम, द्वितिय, तृतिय र सान्तवना स्थान हासिल गर्न सफल प्रतियोगितालाई क्रमश नगद ५ हजार, ३ हजार, २ हजार र १ हजारको साथमा प्रमाण पत्र प्रदान गरिएको ‘हामी स्वयमसेवी अभियान’का जिल्ला संयोजक तेज बहादुर बरुवालले जानकारी दिए ।
उनका अनुसार अभियानले जिल्लाको ५१ वटा सामुदायिक माध्यमिक विद्यालय मध्ये ३० वटामा ‘हामी स्वयमसेवी अभियान’को समुह गठन गरिएको छ । जिल्लामा दुव्र्यसन रोक्न र विपत व्यवस्थापनमा टेवा पुगोस भन्ने उदेश्यले गठित समुहका विद्यार्थीहरुको लागि प्रतियोगिता सञ्चालन गरिएको हो ।
उद्घाटन कार्यक्रममा बोल्दै कोशी प्रदेशका आन्तरिक मामिला तथा कानुन मन्त्रालयका सचिव उमेश बस्नेतले दुव्र्यसन रोकथाम तथा विपत व्यवस्थापनका लागि तिनै तहको सरकारको समन्वय आवश्यक रहेको बताएका छन् । मुलुक संघियतामा गएसँगै तिन तहको सरकार सकृय रहेकाले स्थानीय, प्रदेश र संघिय सरकारको समन्वय प्रभावकारी भयो भने मात्रै विकास र परिवर्तनले फड्को मार्न सक्ने बस्नेतले बताए ।
जिल्ला समन्वय समिति सोलुखुम्बुका प्रमुख कृष्ण प्रसाद निरौलाले ‘हामी स्वयमसेवी अभियान’ गाउँ/गाउँ सम्म पुग्नुपर्ने आवश्यकता रहेको बताए । कार्यक्रम प्रभावकारी रहेको भन्दै यसलाई गाउँघर सम्म विस्तार गर्नमा ढिला भईसकेको उनको भनाई छ ।
यस्तै प्रमुख जिल्ला अधिकारी बसन्त भट्टराईले विद्यार्थीहरु सामाजिक सचेतना फैलाउने सवालमा राजदुत भएकाले विद्यार्थी मार्फत गरिएको कार्यक्रम सफल हुने विश्वास व्यक्त गरे । समाजको हरेक कुना कन्दरामा विद्यार्थी हुने भएकाले विद्यार्थी मार्फत सुरु गरिएको कार्यक्रमले सार्थकता पाउने प्रजिअ भट्टराईको भनाई छ ।
