काठमाडौँ, २९ वैशाख । सामुदायिक (सरकारी) विद्यालयमा अध्ययन गरेर राम्रो नतिजा ल्याउन सकिन्न भन्ने आम बुझाइलाई धादिङकी रुबिना श्रेष्ठले गलत सावित गरिदिएकी छिन् । धादिङको सिद्धलेक गाउँपालिका–२ घर भई हाल काठमाडौँको बाफलस्थित ज्ञानोदय माध्यमिक विद्यालयबाट २०८२ सालको एसइइ परीक्षामा सामेल भएकी रुबिनाले ४.० जीपीए प्राप्त गर्दै सामुदायिक विद्यालयको शिर उच्च बनाएकी हुन् ।
संघर्ष र दृढ विश्वासको प्रतिफल
धादिङको विकट गाउँको श्री नलाङ्ग पात्ले माविबाट कक्षा ५ सम्म नेपाली माध्यममा पढेकी रुबिनालाई काठमाडौँको अङ्ग्रेजी माध्यमको विद्यालयमा भर्ना हुन सुरुमा सहज थिएन । तर, अङ्ग्रेजी भाषाभन्दा विद्यार्थीको ’क्षमता’ हेरेर भर्ना लिने ज्ञानोदय माविको निर्णयलाई उनले आफ्नो मेहनतले सही साबित गरिन्।
उक्त विद्यालयबाट यस वर्ष ४.० न्एब् ल्याउने २१ जना प्रतिभावान विद्यार्थीमध्ये उनी एक हुन् । इन्जिनियर बुबा विष्णुलाल श्रेष्ठ र आमा रत्न कुमारी श्रेष्ठकी सुपुत्री रुबिनाको यो सफलतामा पारिवारिक वातावरणको ठुलो हात छ। सन् २०१७ मा सिभिल इन्जिनियरिङमा उत्कृष्ट नतिजासहित अवार्ड पाएका बुबाको मार्गदर्शनमा उनले मोबाइल, टिभी र सामाजिक सञ्जाललाई नियन्त्रित गर्दै केवल अध्ययनमा ध्यान केन्द्रित गरिन् ।
भविष्यको योजनाः स्वदेशमै सेवा गर्ने लक्ष्य
मृदुभाषी र अनुशासित स्वभावकी रुबिना भविष्यमा डाक्टर वा इन्जिनियर बनेर आफ्नै देशमा केही गर्न चाहन्छिन् । आफ्नो सफलताको मन्त्र सुनाउँदै उनी भन्छिन् ।
“ठुलो उद्देश्य भन्दा पनि सरल रूपले नियमित अध्ययन गर्ने, बुझेर पढ्ने र साथीहरूबीच स्वस्थ प्रतिस्पर्धा गर्ने बानीले नै मलाई यहाँसम्म पु¥याएको हो ।” रुबिनाको यो नतिजाले गुणस्तरीय शिक्षाका लागि महँगो निजी विद्यालय नै रोज्नुपर्छ भन्ने भ्रमलाई चिर्दै देशभरका सामुदायिक विद्यालयमा पढ्ने विद्यार्थीहरूका लागि एउटा ठुलो उत्प्रेरणा जगाएको छ ।
