सोलुखुम्बु । विश्वको सर्वोच्च शिखर सगरमाथाको काखैमा अवस्थित खुम्बुङ ग्रिन भ्यालीले पर्यटकको ध्यान आकर्षित गरिरहेको छ । समुन्द्रि सतहबाट ३ हजार ८ सय ५० मिटरको उचाईमा रहेको यस गाउँ हेर्नकै लागि पनि कतिपय स्वदेशी तथा विदेशी पर्यटकहरु आकर्षित हुने गरेको छ ।
आ–आफ्नै ईच्छा र छनौट प्राथमिक्तामा पर्ने आजको युगमा पनि हिमाली भेगमा भने एक अभुतपुर्व एकता खेखिएको छ । त्यो सुन्दर हिमाली गाउँ हो खुम्जुङ । जहाँ सैयौँ घरमा एउटै रंगको छाना लगाउन सबै स्थानीय एक मत छन् । सबै काममा एकता देखाउने हिमाली आदिबासि शेर्पा समुदायले सिंगो गाउँकै छाना एउटै रंगको लाएर विश्व समुदायलाई चकित बनाएका छन् ।
हिमाल हेर्न आउने विश्व भरिका मान्छेको मन र क्यामेरा दुवैमा अनिवार्य कैद हुने गाउँ हो खुम्जुङ ग्रिन भ्याली । खुम्बु पासाङल्हमु गाउँ पालिका वडा नम्बर ४ मा रहेको यस हरित उपत्याका विश्वकै सर्वोच्च शिखर सगरमाथा रहेकै वडामा पर्छ । गोकियो क्षेत्र हुँदै आधारशिविर जाने पर्यटक यही क्षेत्रबाट जाने गर्छन् ।
समुन्द्रि सतहबाट ३ हजार ८ सय ५० मिटरको उचाईमा रहेको यस गाउँबाट धेरै हिमालहरु नजिकबाट नियाल्न सकिन्छ । खुम्जुङका १ सय ८० घर र खुन्दे गाउँका करिब १ सय घरमा हरियो बाहेक अन्य कुनै रंगका जस्ता र छानो देख्न पाईदैन । जसका कारण पर्यटकहरु आर्कषित हुने गरेको स्थानीय अगुवा तेन्जिङटासी शेर्पाले बताए ।
१५ बर्ष अगाडी स्थानीय अगुवा र खुम्जुङयुवा क्लबको अग्रसरतामा शुरु गरिएको ग्रिन भ्यालि अभियानमा विभिन्न दातृ निकायले सहयोग गरेका थिए । यस क्षेत्रमा हरियो बोट विरुवाहरु हुर्किन नसक्ने भएकाले पनि गाउँलाई हरियाली बनाउन जस्तापातामा एकरुपता स्थानीयले रोजेको ख्युम्बिला मध्यवर्ति क्षेत्र उपभोक्ता समितिका अध्यक्ष छिमि छिरी शेर्पाको भनाई छ ।
स्थानीयलाई हरित उपत्यकाकै कारण ब्यापार प्रबद्र्धनमा पनि ठूलो टेवा पुगेको छ । हरित गाउँ हेर्नकै लागि विदेशी पर्यटक त्यहाँ पुग्ने भएकाले खुम्जुङमा होटल ब्यवशाय पनि फस्टाएको स्थानीय होटल ब्यवशायी मिङमार कान्छि शेर्पा बताउँछन् ।
नयाँ बन्ने घरले पनि अनिबार्य हरियो जस्ता प्रयोग गर्ने नियम स्थानीयले बनाएका छन् । यो नियम विपरित अन्य रंगको छाना प्रयोग गर्नेलाई मध्यवर्ती क्षेत्र विकास समितिको ब्यवस्थापनमा रहेको सगरमाथा राष्ट्रिय निकुञ्ज भित्रको घाँस–दाउरा काट्न निषेध गरिएको छ भने स्थानीय पनि उत्साहित रुपमा एकताबद्ध भएर हरियो जस्ता प्रयोग गर्ने अभियानमा लागेका छन् ।
